راجہ فاروق حیدر کے حق میں سردار عتیق کی اہم آواز، میڈیا ٹرائل پر کھل کر بول پڑے!

مظفرآباد: سردار عتیق احمد خان کی راجہ فاروق حیدر سے اہم ملاقات، آزاد کشمیر کی سیاسی صورتحال اور پونچھ میں امن و امان پر تبادلہ خیال مظفرآباد (آواز نیوز): آل جموں و کشمیر مسلم کانفرنس کے صدر اور سابق وزیراعظم آزاد کشمیر سردار عتیق احمد خان نے مظفرآباد میں سابق وزیراعظم آزاد جموں و کشمیر راجہ محمد فاروق حیدر خان سے اہم ملاقات کی، جس میں آزاد کشمیر کی موجودہ سیاسی صورتحال، پونچھ میں امن و امان کی بحالی اور باہمی دلچسپی کے دیگر امور پر تبادلہ خیال کیا گیا۔ ملاقات کے بعد سوشل میڈیا پر جاری اپنے بیان میں سردار عتیق احمد خان نے کہا کہ آزاد کشمیر کی سیاست ہمیشہ رواداری، برداشت، باہمی احترام اور شائستگی جیسی اعلیٰ روایات کی امین رہی ہے۔ سیاسی اختلافات کے باوجود ماضی میں تمام سیاسی قوتوں نے ان اقدار اور روایات کا احترام کیا ہے۔ انہوں نے سابق وزیراعظم راجہ محمد فاروق حیدر خان اور ان کے اہل خانہ کے خلاف گزشتہ کچھ عرصے سے جاری مبینہ میڈیا ٹرائل پر افسوس کا اظہار کرتے ہوئے کہا کہ سیاسی اختلافات کو ذاتیات اور خاندانوں تک لے جانا کسی صورت مناسب نہیں۔ سردار عتیق احمد خان کا کہنا تھا کہ سیاسی اختلافات جمہوری عمل کا حصہ ہیں، تاہم ان اختلافات میں اخلاقی حدود اور باہمی احترام کو برقرار رکھنا ضروری ہے۔ ملاقات میں پونچھ کی صورتحال اور خطے میں امن و امان کی بحالی سے متعلق امور بھی زیرِ بحث آئے۔ آواز نیوز | AWAZ With Amer Khan www.awaznews.live