نان پی ٹی اے موبائل صارفین کے لیے بڑی خوشخبری، ایف بی آر نے سیلز ٹیکس اقساط میں ادا کرنے کا طریقہ کار متعارف کرا دیا

اسلام آباد: فیڈرل بورڈ آف ریونیو (ایف بی آر) کی جانب سے درآمدی موبائل فونز پر عائد سیلز ٹیکس کی ادائیگی کے لیے نئی سہولت متعارف کرانے کی دستاویز سامنے آگئی، جس کے تحت اہل صارفین یکمشت ادائیگی کے بجائے ماہانہ اقساط کا انتخاب کر سکیں گے۔ 22 اکتوبر 2026 کی تاریخ سے جاری کردہ کسٹمز جنرل آرڈر نمبر 06/2026 کے مطابق، موبائل فون رجسٹریشن کے نظام DIRBS کے ذریعے درخواست دینے والے اہل افراد کو سیلز ٹیکس مساوی ماہانہ اقساط میں ادا کرنے کا اختیار دیا گیا ہے۔ دستاویز کے مطابق اقساط کی تعداد متعلقہ مالی سال کے اختتام تک باقی رہ جانے والے مہینوں کے برابر ہوگی، جبکہ پہلی قسط رجسٹریشن کی درخواست کے وقت جاری ہونے والے پیمنٹ سلپ آئی ڈی (PSID) کے ذریعے ادا کرنا ہوگی۔ بعد کی ہر قسط کے لیے الگ PSID جاری ہوگا اور تمام واجبات کی ادائیگی متعلقہ مالی سال کے اختتام، یعنی 30 جون سے پہلے مکمل کرنا ہوگی۔ جون میں درآمد کیے جانے والے موبائل فونز پر پورا سیلز ٹیکس اسی ماہ کے اختتام سے پہلے ادا کرنا لازم ہوگا۔